Tuesday, January 11, 2011

पत्र नव्हे (इंग्रजी) मित्र!

अखेर बरेच दिवस गाजावाजा होत असलेली घटना घडली आणि मुंबईचा मटा पुण्यात दाखल झाला. 'सकाळ'वर लिहिलेल्या माझ्या या लेखाच्या शेवटी व्यक्त केलेली माझी इच्छा ['दगडापेक्षा वीट मऊ' या नात्याने लोक अजूनही सकाळच घेत आहेत. त्यांच्या या नाविलाजावर काहीतरी उपाय निघो नि त्यांना सकाळसाठी एक उत्तम पर्याय लवकरात लवकर उपलब्ध होवो अशी प्रार्थना करणे एवढेच तूर्त आपल्या हाती आहे!] इतक्या लवकर फलद्रूप होईल असे मला वाटले नव्हते. मी मटा घरी ४/५ दिवस वाचतो आहे खरा, पण का कोण जाणे, आता मात्र रोगापेक्षा इलाज भयंकर असेच काहीसे मला वाटू लागले आहे!

सकाळमधे इंग्रजीचा वापर भयंकर वाढला आहे अशी मी तक्रार करत असलो तरी तो मटापेक्षा निश्चितच कमी आहे याबाबत वाद नसावा. मटा वाचताना असे वाटतच नाही की आपण एक मराठी वृत्तपत्र वाचत आहोत, असे वाटते की आपण देवनागरी लिपीत लिहिलेले एक इंग्रजी वृत्तपत्र वाचतो आहोत. म्हणजे मराठी वृत्तपत्रे लाजेकाजे का होईना मराठी शब्द वापरताना दिसतात, मटा मात्र त्या भानगडीत पडत नाही. मटामधे प्रसिद्ध झालेल्या या शीर्षकांवरून नि बातम्यांवरून याची खात्री पटावी.

***मुलांवर नजर... 'बिग बॉस'ची!

मुलांना शाळेत सोडल्यानंतर आता नोकरदार पालकांना त्यांच्याबद्दल काळजी करण्याचे कारण नाही! आपले पाल्य शाळेत पोहोचले का, शाळेतून घरी आले का, असे सर्व प्रश्न सोडविण्यासाठी इंग्रजी माध्यमाच्या शाळांमधून रेडिओ फ्रिक्वेन्सी आयडेन्टीफिकेशन डिव्हायसेस सिस्टीमची (आरएफआयडी) सेवा उपलब्ध करून देण्यात आली आहे. मुलांना देण्यात आलेल्या आयकार्डमुळे पालकांना मोबाइलवरील मेसेजद्वारे ही सर्व माहिती प्राप्त होत आहे.***


***पुण्याच्या रस्त्यांवर एलपीजी स्फोटके!

तुम्ही रिक्षात किंवा कारमध्ये 'एलपीजी किट' बसवले आहे, त्याला पाच वर्ष पूर्ण झाली आहेत आणि तरीही तुम्हाला 'हायड्रो टेस्ट'बद्दल काहीच माहिती नाही? मग तुम्ही नक्कीच मोठी 'रिस्क' घेताय. वाहनांमधील एलपीजी सिलिंडर कालांतराने लीक होण्याची शक्यता असते. लिकेजमुळे मोठी दुर्घटना होऊ शकते, त्यामुळे वेळीच 'हायड्रो टेस्ट' करुन घ्या आणि निर्धास्त व्हा!***


***'मेंटल' मृत्यूप्रकरणी आंदोलनाचा इशारा

थंडीने गारठून मेंटल हॉस्पिटलमधील पेशंटचा झालेल्या मृत्यूमुळे हॉस्पिटलच्या कारभाराचा कडेलोट झाला असल्याचे स्पष्ट झाले आहे.***


*** एम्बलेम चोरणाऱ्या विद्यार्थ्यांना पकडले

महागड्या गाड्यांचे एम्बलेम चोरले तर खूप पैसे मिळतात, असे कोणी तरी सांगितले आणि त्यावर चार शाळकरी दोस्तांनी विश्वासही ठेवला. बीएमडब्ल्यू, जग्वार, मारूती असे मोठ-मोठ्या गाड्यांचे एम्बलेमही चोरले.***

मराठी वृत्तपत्रसृष्टीचा आजपर्यंतचा इतिहास असे सांगतो की एका शहरात प्रसिद्ध असलेले वृत्तपत्र अजूनपर्यंत दुस-या शहरात आपले पाय रोवू शकलेले नाही. कोल्हापुरातला पुढारी पुण्यात फारसा चालत नाही, पुण्यातला सकाळ मुंबईकरांना पसंत पडत नाही आणि नागपुरातला तरूण भारत बाकीच्या महाराष्ट्रातले लोक हातातही धरत नाहीत. असे का घडावे याची कारणे अज्ञात आहेत. प्रत्येक वृत्तपत्र त्या त्या शहराच्या स्वभावानुसार घडलेले असल्याने ते इतर शहरांना पसंत पडत नाही असे होत असावे कदाचित. मटा हे मुंबईतून प्रसिद्ध होणारे वृत्तपत्र आहे आणि मुंबई एक अठरापगड लोकांचे शहर असल्याने तिथली दैनंदिन भाषा अर्थातच मराठी नाही. तिथली मराठी इंग्रजाळलेली असल्याने तिचे प्रतिबिंब तिथल्या वृत्तपत्रात पडणे साहजिक आहे.

एकूणच ही मुंबईची पाणीपुरी पुणेकरांना पसंत पडते का ते येत्या काही दिवसात दिसेल. पण तोपर्यंत मटामुळे मी 'माझा एक इंग्रजी मित्र आहे' असे म्हणून लोकांमधे भाव खावू शकतो हे काय कमी आहे?

3 comments:

  1. Kharay. Ata kahi thinkani shabda jasa chya tasa lihinyala paryaya nasato. Pan tasa lihila tar tyacha jamel tya prakare Marathi madhe anuvaad karun lihila pahije tithe. Udaharan mhanje RFID. Tyacha aahe te naav liha pan tyacha marathi anuvaad pan liha na tithe. Ani PATIENT, HOSPITAL, EMBLEM mhanje tirtha madhe whisky misalnya sarkha kilasvana prakar aahe. Shevti MaTa Mumbai cha aahe. Pudhe asnarach saglya goshtin madhe.

    ReplyDelete
  2. pan lokana kuthe shudh marathi kalte?

    ReplyDelete